Hymnus de Marciana, virgine et martyre Caesareae in Mauritania
Anonymous
BHL: NA
Feast: January 9
- Sacrae triumphum martyris
- Celebret vox ecclesiae:
- Camena sit cunctis una,
- Marcianae in laudem virginis.
- Quae passionis praemium,
- Dum tendit, adipiscitur:
- Ultro ad palaestram gloriae
- Audet prompta concurrere.
- Haec namque astantem daemonis
- Cernens, adlisit effigiem;
- Sub cuius larga perpetim
- Fluebat unda gressibus.
- Mox flagitis caesa, trahitur
- Celsa ad praetoris atria:
- Atque ludis illicitis
- Prosternit membra virginis.
- Quam praedo pudicitiae
- Dum inter umbras sequitur,
- Oblata ex templo caelitus
- Secluditur maceria.
- Vincta deinde stipite,
- Profana voce includitur:
- Sed poenas fert blasphemia,
- Ruinas, et incendia.
- Emissa namque bestiis,
- Leo percurrit percitus,
- Adoraturus veniens,
- Non comesturus virginem.
- Taurus dehinc prosiliens,
- Forma et mugitu horribili,
- Sulcabat eius teneras
- Papillas ictu vulnerans.
- At fera pernix corpore,
- Et maculoso tegmine,
- Lethali dente ad ultimum
- Membra puellae laniat.
- Post hos triumphos anima
- Vinclis elapsa corporis,
- Plaudens petit ad libera
- Summi poli fastigia.