Hymni de Potito martyre
I. Antiphonae in Vesperis et Laudibus
- Ostella Christi fulgida,
- Potite martyr inclite,
- Obscura culpae nubila
-
A mente nostra discute.
- Tu clarus inter martyres
- Fulges, ut inter sidera
- Sol, ac ut inter candida
-
Ligustra candent lilia.
- Luces ut ardens lampada,
- Humana lustrans pectora;
- Ut sal per orbem spargeris,
-
Humana siccans vulnera.
- Non sic Potite cynnama
- Attrita spirant, moribus
- Ut tu modestis, florida
-
Aetate, fragras saeculo.
- Post clara mortis funera
- Illustris inter angelos
- Tanto refulges lumine,
- Quanto per orbem nomine.
II. Hymnus in Vesperis
- Claret Eois puer ortus oris,
- Claret illustri patre, claret alta
- Matre, quid mirum quod in urbe clara
-
Clareat infans?
- Id magis mirum, quod ab axe claro
- Sol eum Christus potiore luce,
- Inter atratas rutilum tenebras,
-
Traxerit ad se.
- Ut rosam e spinis, veluti coruscum
- Sidus a tetra nebula Potitum
- Traxit infantem pius auctor orbis
-
Matris ab aluo.
- Traxit, ut vero sibi sole nato
- Bruta despectet simulachra: trino
- Numine ac uno potiatur, omni
-
Quo calet aestu.
- Martyr o mi, dum frueris Tonante,
- Virgines curae tibi sint, quotannis
- Festa condentes tibi: dexter adsis,
-
Dum sacra complent.
- Dum tibi dulces modulantur hymnos,
- Thura dum sacras adolent per aras,
- Dum parant lychnos, et olente fanum
-
Flore coronant.
- Dum crocum, calthas, violas, ligustra,
- Cum rosis nardum, thyma cum marino
- Rore, sic dextra, ut calatho per aedem
-
Undique spargunt.
- A Dei regno, pie martyr, audi
- Virginum suspiria; cerne fletus,
- Vota, singultus, ut odora defer
-
Lilia Iesu.
- Summa laus uni Triadi per aevum,
- Quae velut parvo tribuit Potito
- Lauream, nobis prece donet eius
- Gaudia divum.
III. Hymnus ad matutinum
- Potite martyr inclite,
- Dum sacra reddis annuo
- Ritu colenda virginum,
-
Adsis choro psallentium.
- A solis ortu pullulas
- E stirpe pravi germinis,
- Velut rosarum flosculus
-
E stirpe dura veprium.
- Parente natus ethnico,
- Afflaris aura Spiritus,
- Quo falsa calces numina,
-
Crucis trophaeum provehis.
- Cupressus, ut crinitulo
- Viburna praestat vertice;
- Virtute sic tu parvulus
-
Praecellis omnes maxima.
- Non sic, Potite, cynnama
- Attrita spirant, moribus
- Ut tu modestis, florida
-
Aetate, fragras saeculo.
- Tu praedicator promptulus
- In urbe fulges propria,
- Iesum parenti praedicas,
-
Fidemque pandis civibus.
- Laus unitati triplici,
- Pro qua Potitus sanguine
- Fuso, potitur martyrum
- Palma, in columbae imagine.
IV. Antiphonae ad I. Nocturnum
- Iesu decora caelitum
- Corolla, Iesu martyrum
- Spes, cerne nos, dum militis
-
Tui canamus proelium.
- Cur Antonine perfuris,
- O Caesar angue dirior,
- Leone saevo saevior?
-
Cur bile turges vitrea?
- Non sculpta adorat marmora,
- Nec ligna credit numina;
- Aurum Potitus despicit,
-
Nec thura libat belluis.
- Dura contemnit verbera,
- Tetrumque spernit carcerem,
- Nec voce blanda flectitur,
-
Minas nec horret efferas.
- Flagella sicut lilia
- Sumit, et illa dedicat
- Deo flagranti pectore,
-
Sicut rosarum flosculos.
- Olor nec albus gestiens
- Aquas subintrat vitreas,
- Olivum ut intrat bulliens,
- Amore Iesu, parvulus.
V. Antiphonae ad II. Nocturnum
- Phoenix ut inter cynnama
- Exusta fit vivacior;
- Sic hic lebete fervido
-
Mersus, resurget fortior.
- Potitus instar angeli
- Factus fide fortissimus,
- Numen Minervae despicit,
-
Iovique thura denegat.
- Cunctis est aequa regula,
- Dulcore firmat debiles,
- Virtute fortes roborat,
-
Utrosque amore confovet.
- O miles, o fortissime
- Athleta Iesu, sanguinem
- Dum corpus unda profluis,
-
Ad astra mittis spiritum.
- Sic torque victor aurea
- Collum venustas saucium:
- Sic morte vitam laureas,
-
Vita triumphans perpeti.
- O ter beate parvule,
- Qui sufferendo laurea
- Donaris, o quam strenue
- Mortem triumphas mortuus!
VI. Hymnus ad Laudes
- Ingens Dei potentia,
- Et martyris victoria,
- Crudelis ira praesidis
-
Et belluarum mititas!
- Quaecumque saevit dentibus,
- Cornu, vel ungue bellua,
- Ad martyris vestigia
-
Ut mitis est ovicula.
- Tormenta sic amplectitur,
- Ut grata caeli munera;
- Sic blandimenta respuit,
-
Ut dira mortis vulnera.
- Per haec, Potite, pignora,
- Quae Iesus ultro contulit,
- Sacris roga virgunculis
-
Candentis Agni nuptias.
- Post quem canendo gestiant
- Plenis oliva lampadis;
- Odora dent vaccinia,
-
Stolis amictae candidis.
- A vanitate saeculi,
- A carnis aestu lubricae,
- Et a maligno daemone
-
Hastu, Potite, libera.
- Deo sit uni gloria,
- Qui nos ab omni protegat
- Malo, precatu martyris,
- Ac regna det caelestia.
VII. Hymnus ad II. Vesperas
- Ardet o felix anima, ardet igne,
- Igne divino, rabiem tyranni
- Voce demulcet placida, silendo
-
Mitigat iram.
- Flagra ceu flores (quibus ante Iesum
- Serta contexat) patitur, cruenta
- (O Dei virtus!) veluti smaragdos,
-
Vulnera suffert.
- Carcerum vinclis puer arctus, uncis
- Pectinum clavis lacerus, lebetem
- Intrat ignitum: calido triumphat
-
Mersus olivo.
- Vincit, immanes patiendo poenas,
- Caesarem: lassat lanios, flagella
- Mente tranquilla subeundo: victor
-
Cum nece pugnat.
- Angeli verbo monitus, propinquam
- Haud secus mortem cupit, ac perennis
- Ianuam vitae, requiem laborum,
-
Praemia pugnae.
- Unde transfixo capiti cruento
- Clavo, et immerso iugulo mucrone,
- Spiritum felix super alta fudit
-
Astra Potitus.
- Morte sic victa, viridante lauro
- Verticem cingit: sacra colla comit
- Torque gemmata: fruitur Tonante
-
Martyr in aevum.
- Si caro prurit, niveum pudoris
- Irriga rorem: Sathanae sagittas
- Frange, si dirus iacit hostis; armis
-
Arma retunde.
- Pompa si caeci peritura saecli
- Ridet, aeternae moderare vitae
- Gloria: pulsis fame, peste, bello,
-
A lare nostro.
- Laus sit aeternae Triadi perennis,
- Et Patri, et Nato, et tibi ubique sancte
- Spiritus: martyr quibus aline nostra
- Vota referto.
VIII. Varia Responsoria
- […]1 Grate mi, puer, aure dextra,
- Quas tibi laudes recinunt sacratae
- Virgines, sancte, ac modulos pudico
-
Pectore promptos.
- Hi tibi pro thure et olente nardo,
- Pro thymi fasce, et calatho rosarum,
- Dantur: ut gemmas et odora, quaeso,
-
Balsama sume.
- Ut puer primum dubiae dolosum
- Attigit vitae bivium; relicta
- Mox via lata, studuit per arctum
-
Scandere callem.
- Totus in sacris vigilat, caduci
- Nil cupit: Divum veneratur aedes:
- Percolit summa pietate trinum
-
Numen et unum.
- Sic iugo Christi puerile collum
- Subdit, et stivam retinens aratri,
- Ut decet, sulcat bonitatis arvum
-
Vomere pacis.
- Non minus caelum precibus fatigat,
- Quam pio cultu: lacrimis nigrantem
- Abluit noctem, Sathanam repellit
-
Dulcibus odis.
- Diva scrutatus monumenta Vatum,
- Sacra degustat rudimenta Iesu:
- Tum Liam stringens, fruitur Rachele,
-
More Iacobi.
- Ut sibi nomen peperit Potiti
- Martyr insignis, potiendo dulce
- Caelitum nectar, peritura sprevit
-
Cuncta sub astris.
- Sprevit aetatis roseum tenellae
- Flosculum, sprevit titulos avorum,
- Purpuram, fasces, galeam, curules,
- Praedia, census.
IX. Varia Responsoria
- Pauper ad nudum properare Iesum
- Pergit amplexa Cruce. Fit supernae
- Praevius doctor patriae, fit alti
-
Praeco Tonantis.
- Grande virtutum iubar, aequa morum
- Norma, doctrinae schola christianae,
- Mitis exemplar pietatis, almae
-
Lux bonitatis.
- Gratus hic mundo fuit a tenellis
- Unguibus; matris fuerat ab alvo
- Gratior caelo, magis est in astris
-
Gratus utrique.
- Hic feras passus rabidas, leones
- Calcat immanes, dominatur ursis:
- Sed prius vincens superat furentem
-
Praesidis iram.
- Mortuus mundo, Sathanae, parenti,
- Ac sibi; caelo, Superis, Tonanti
- Vivit illustris Domini Potitus
-
Martyr in aevum.
- Ergo si talis tibi vita fulsit
- Saeculo, nobis super astra regnans
- Impetra optatae bona pacis arrham
-
Gaudia caeli.
- Vernat ut candens rosa rore tacta,
- Rore ceu vernat foliis apertum
- Lilium, vernat veluti profusus
-
Rore hyacinthus.
- Lux patri factus, meliora vivo
- Pandit exemplo documenta: quod nam
- Egerit primum, sociis agendum
-
Praecipit actu.
- Unde pro Christi nece tu cruentam
- Eligens mortem, velut agnus ensi
- Colla flexisti, o pie martyr, o mi
-
Dive Potite.
- O pia, o felix anima, o beate
- Spiritus, terrae spolium caducae
- Deserens carnis, superas ovando
- Scandis in arces.
X. Varia Responsoria
- Non pius laedit liquor, aut eburna
- Membra tam candens oleum, nec ignis
- Quid pili tangit minimum: pudorem
-
Flamma veretur.
- Martyr a summo, precor, axe gratis
- Gratiam per te […] praestet orbis
- Auctor, ac sacris faueat puellis
-
Numine fausto.
- Centuplum reddant oleae, per arva
- Semen in fruges vireat, Falernum
- Vineae fundant decuplum, precante
-
Te, pie martyr.
- Pace nos dulci refove, salubrem
- Aerem cura, scelerum reatus
- Qua vales purga prece, martyr, ante
-
Iudicis iram.
- Pro tuis regnum meritis Latinum
- A fame, a bello tueare, quaeso,
- Quaeso ut a peste, a tonitru, a corusco
- Fulmine serves.
-
Perhaps Audi ↩︎