Hymni de Gerlaco, eremita in Belgio
Ex Officio Ruraemundensi
I. Hymnus ad Vesperas et Laudes
- Gerlace, qui domum tibi,
- Spretis superbis oppidis,
- Et spreto amore saeculi,
-
Quercum cavatam diligis:
- In qua, remotis arbitris,
- Tu te supra te tolleres,
- Rerum levatus pondere,
-
Quae ad ima mentes detrahunt.
- Hic pane aquaque victitans,
- Raro parumque dormiens,
- Vitae prioris crimina
-
Vi lacrimarum diluis.
- Timor cupidoque exulant,
- Et omne curarum genus:
- Atque his repulsis, gaudia
-
Dat pura conscientia.
- Hic nocte tendis et die
- Cor et preces in aethera.
- Sic cella, quamvis parvula,
-
Magni poli fit aemula.
- Gerlace Falcoburgie,
- Nunc huc, precamur, respice;
- In nomen effusos tuum
-
Precatione nos iuva.
- Iuvabis, ingentes modo
- Pii canamus gratias
- Huic, qui tot inter maxima
-
Nobis dedit te munera.
- Gloria tibi Domine,
- Qui scandis super sidera
- Cum Patre et sancto Spiritu
- In sempiterna saecula.
II. Hymnus ad Matutinum
- Gerlacus ille, sanctitas
- Cuius tot olim claruit,
- Claretque adhuc miraculis,
-
Nunc efferendus laudibus.
- Testatur hoc, quae caeliti
- Huic unda potum praebuit:
- Illius haustu plurimis
-
Est restituta sanitas.
- Ter imminente tempore
- In astra divi transitus,
- Hanc in merum vis maximi
-
Mutavit undam numinis.
- Honore Falcoburgii
- Hanc prosequantur maximo,
- Quibus per illam contigit
-
Certare Canae laudibus.
- Aqua ista cum sit efficax,
- Possitque morbos pellere,
- Quod pota quondam sit tibi,
-
Te multa posse credimus.
- Gerlace fac, te quaesumus,
- Creator omnium Deus,
- Tuo rogatu, supplicum
-
Ut vota nostra exaudiat.
- Gloria tibi Domine,
- Qui scandis super sidera,
- Cum Patre et sancto Spiritu
- In sempiterna saecula.