Hymni de Amando, episcopo Traiectensi Elenone in Belio
Hymnus I
- Amande, Praesul optime, dignus tuo qui nomine,
- Amando Christum congruum, sortitus es vocabulum.
- Audi tuorum dulcia, vernaculorum carmina
- Quae concinunt, gratissimo praecordiorum gaudio.
- Dum floruisti corpore, mundum replesti lumine
- Astrum poli nunc splendidam candore vincis Cynthiam.
- Pater pius, pastor bonus, multis fuisti gentibus:
- Has recreando flumine, illas docendo famine,
- Frater pupilli flebilis, soror gementis exulis:
- Patrem vocavit orphanus, matremque sensit languidus.
- Caecis ocellus lucidus, claudisque pes tutissimus,
- Perirque ligno pendulus, vitam recepit mortuus.
- Quid plura, miles inclite, nostro canamus carmine?
- Quicumque venit debilis, nullus recessit flebilis.
- Nunc Abrahae vernantibus laetus quiescit sedibus,
- De Iesu dulci corpore, mandis, bibisque sanguine.
- Iam copulatus inclitis archangelorum gaudiis,
- Vertex rubescit gemmulis, et colla candent infulis.
- Nostri memor sanctissime hic exulantum corpore,
- (Tuus popellus adsumus) succurre nobis, quaesumus:
- Ut quando Iesus venerit cum carne, qua hinc abiit,
- Non segregemur a tuo clemens Pater consortio.
- Deo Patri sit gloria, Eiusque soli Filio. Amen.
Hymnus II
- Ave Pater, Pastor noster, Pontifex egregie,
- Ave carus amor noster, dulce nomen, Amande.
-
Ave Praesul gloriose, semper amantissime,
- Iure tibi laudum melos concinendo pangimus.
- Sed condignas tanto Patri ferre laudes nequimus,
-
Corde tamen quod gestimus, plectro linguae promimus.
- A primaevo nempe flore sacrae pueritiae
- Moribus aevum senile visus es attingere,
-
Multis et normam praebere perfectae iustitiae.
- Mox signorum gloriosis muneratus titulis,
- Triumphalis signo Crucis anguem saevum proteris
-
Verbique virtute pellis ogiae de terminis.
- Virtutes excoluisti studio pervigili,
- Ipse sed occuluisti mente semper humili,
-
Favor ne daretur tibi sed superno numini.
- Hinc factus praesul mactusque Deitatis munere,
- Ut lucerna ardens fide, claro lucens opere,
-
Iure celso candelabri sublevaris stipite.
- Tu redemptor captivorum, consolator pauperum,
- Tuque pater pupillorum, tu mater orphanorum,
-
Vigor paralyticorum, effugator daemonum,
- Tu surdis auditum praestas, tu caecos illuminas,
- Lurida tu membra purgas, mortuum resuscitas.
-
Verbis simul et exemplis animas vivificas.
- Nostra laus succumbit tantae tibi datae gratiae,
- Dum mundum reples doctrinae virtutumque munere.
-
Famam diffundens et terrae, et caeli per cardines,
- Nunc precamur, Pater alme, vota nostra suscipe.
- Et Iesum benignum posce, nobis semper parcere.
-
Ac post huius finem vitae, tecum semper vivere,
- Annue votis poscentum, Deus factor omnium.
- Esse credimus quem trinum atque unum Dominum,
- Manet quem laus ante aevum nunc et in perpetuum. Amen.