Epitaphium Eutychii, martyris Romae
Damasus I
BHL: N/A
Feast: February 4
- Eutychius martyr crudelia iussa tyranni,
- Carnificumque vias pariter tunc mille nocendi
- Vincere quod potuit, monstrantis gloria Christi.
- Carceris inluviem sequitur nova poena per artus:
- Testarum fragmenta parant, ne somnus adiret.
- Bisseni transiere dies, alimenta negantur.
- Mittitur in barathrum sanctus: lavat omnia sanguis
- Vulnera, quae intulerat mortis metuenda potestas.
- Nocte soporifera turbant insomnia mentem.
- Ostendit latebra insontis quae membra teneret.
- Quaeritur, inventus colitur, fovet, omnia praestat.
- Expressit Damasus: meritum venerare sepulchrum.