De Walerico, eremita Belga in Gallia
In territorio Lemovicensi sancti Walerici eremitae et confessoris. Qui dilectus Deo et hominibus, in provincia Galliae quae Germania dicitur Inferior, illustrium virorum sanguine, christianis parentibus est natus. Postmodum Christo duce Aquitaniam ingressus, et locum secretum expetens, a clericis ecclesiae Sancti Martialis Lemovicensis, qui eum summa reverentia prosequebantur, locum solitudinis accepit; in quo ei construxerunt cellulam, et ecclesiam in honorem martyris Iuliani. Multi autem eo confugiebant ob disciplinam. Clarescebat etiam, providente Deo, per miraculorum exhibitionem. Omnibus interea virtutibus ornatus, cum senio gravaretur, sanctitate iuvenesceret, sumpto Dominici corporis viatico, inter verba orationis animam Deo laetus reddidit, quinta Epiphaniae die.