De Sethrida, virgine et abbatissa Brigensi in Gallia
Ex Lib. 3 Historiae Ecclesiasticae Gentis Anglorum
Caput 8.
Eo tempore necdum multis in regione Anglorum monasteriis constructis, multi de Britannia monasticae conversationis gratia, Francorum, vel Galliarum monasteria adire solebant, et filias suas eisdem erudiendas ac sponso caelesti copulandas mittebant, maxime in Brige et in Cale, et in Andilegum monasterio. Inter quas erat Sedredo, filia uxoris Annae regis orientalium Anglorum, cuius supra meminimus, et filia naturalis eiusdem regis Edelburg. Utraque cum esset peregrina, prae merito virtutum eiusdem monasterii Brigensis est abbatissa constituta.