De Pega, virgine in Anglia
Ex Historia Croylandensi
Sancta vero Pega soror praefati sancti patris nostri Guthlaci cito post primi anni revolutionem, ab obitu eiusdem, relicto prius ibidem in manibus Kenulphi abbatis flagello sancti Bartholomaei, et psalterio fratris sui, cum nonnullis aliis reliquiis, ad cellam suam navigio remeavit, ab oratorio praenominati fratris sui per quattuor leucas in occidentali plaga distantem. Ubi completo biennio, et tribus mensibus in lugubri lamentatione, ad apostolorum Petri et Pauli limina, in frigore et abstinentia multa peregre profecta est. Cumque civitatem Romanam ingrederetur, omnium signorum classicum repentinum personans, per spatium unius horae sanctitatis eius meritum universis civibus indicavit, ubi divino servitio mancipata, in timore Domini dies suos demum complevit; ac eius sacro corpore terrae illic inter multa alia Romana statuaria commendato, spiritus eius de praesentis vitae labore ad aeternam requiem ascendit.