De Alexandro, episcopo Firmano, martyre in Piceno
Alexander Firmanus patria, ex Sinigarda familia fuisse traditur; qui factus Firmanae ecclesiae episcopus, ab hostibus fidei catholicae, haud procul ab urbe, in via quae ad coenobium Sancti Savini ducit, ob eiusdem fidei defensionem interfectus, martyrio coronatus est. Cuius corpus in basilica metropolitana, in arca marmorea conditum quiescit, ubi epitaphium litteris Longobardicis scriptum hoc legitur:
Hic iacet reconditum beatissimum corpus gloriosi martyris et episcopi Alexandri.
Cuius memoria III Idus Ianuarii Firmi celebratur, prout in Romano Martyrologio annotatur.