Latin Hagiography
A preliminary digital legendarium

Carmina Alcuini Paulino II, patriarchae Aquileiensi in Italia


I.

  • Tingue tuos calamos, caritas, in gurgite Christi,
  • Atque meum pectus imple 1 caelestibus odis,
  • Ut dignas valeam Paulino dicere grates,
  • Mellifluis nostras Musis qui impleverat aures,
  • Et memor unanimi longum post tempus amici
  • Carminibus sacris repetens: “Albine valeto.”
  • Quam festiva dies fuerat cum pagina nobis
  • Laeta 2 fuit titulis optatae inscripta salutis!
  • Omnia dicta mihi caritatis melle manabant;
  • Quo se devertit 3 laetus relegentis ocellus,
  • Cernit ubique suae semper noua gaudia mentis,
  • Maxime iam 4 gaudens in prosperitate paterna,
  • Quem Deus aeterno conservet tempore sanum.
  • O lux 5 Ausoniae, patriae decus, inclitus auctor,
  • Iustitiae cultor, sacrae pietatis amator,
  • Te mea mens ardet sacris conscripta catenis,
  • Diligit, exquirit, complectitur, adtrahit, ambit,
  • Pectoris aeterna secumque recondet in arca.

II.

  • O Pauline pater, pastor, patriarcha, sacerdos,
  • Pars animae 6 melior, nostrae pars inclita vitae;
  • Sis memor Albini, sacris altaribus adstans;
  • Et dulces inter lacrimas super ora fluentes,
  • Dic: “Miserere, Deus, nostro clementer amico,
  • Criminibusque suis veniam largire benignus,
  • Ut te cum sanctis liceat laudare per aevum.”
  • Omnipotens patris virtus, sapientia Christus,
  • Obsecro te supplex toto de pectore pauper,
  • Ut tua conservet Paulinum dextera semper,
  • Protegat atque regat, virtutum floribus ornet.
  • Tuque Maria, Dei genitrix, sanctissima virgo,
  • Prospera cuncta meo Paulino posce, precamur:
  • Ut vigeat, valeat Christi repletus amore.
  • Vos quoque cara simul sanctorum turba Tonanti,
  • Qui bibulas proni monitis caelestibus aures,
  • Ecclesiae patres, habuistis semper apertas,
  • Et nunc cum Christo caelestia regna tenetis.
  • Fundite, proque mei Paulini, posco, salute
  • Cum pietate preces summo super omnia regi,
  • Ut vigeat, valeat Christi praecepta secutus.
  • Et vos, ecclesiae sanctae sanctissima proles,
  • In commune precor prostrato 7 corpore sanus,8
  • Angelici faciem caram 9 Paulini habeatis in aevum,
  • Illius et vitam precibus commendite Christo,
  • Ut vigeat, valeat longaevo tempore sanus.
  • Angelici faciem coetus qui cernitis almam,
  • Perpetui patris caelesti in culmine semper,
  • Expansis manibus humili sed pectore posco,
  • Vos quoque Paulinum precibus defendite vestris,
  • Ut gaudens regnet vestro sociatus honori,
  • Aeternisque Dei vobiscum laudibus adsit,
  • Regna beata tenens felix sine fine polorum.
  • Hos rogo versiculos habeas, pater optime, tecum,
  • Ut tua mens memoret laeto 10 pro carmine nutum.11
  • Sit tibi Christus amor, virtus, decus, omnia Christus.
  • Sit via, vita, salus, spes, laus, et gloria 12 perpes:
  • Semper in ore sonet, maneatque in pectore semper;
  • Ut tibi cum sanctis tribuat caelestia regna:
  • Qua memor esto tui nati, te posco per illum,
  • Qui te perpetuam caeli deducat in aulam.
  • Et nunc et semper, mi mi Pauline, valeto.
  • Carminis hic finem lacrimis faciemus amatis,13
  • Sed numquam sacri finem faciemus amoris.

III. Epitaphium

  • Hic Paulinus ovans toto requiescit 14 in aevo,
  • Hocque cubile pater dignus dignetur habere.
  • Invidus hoc templum numquam pertranseat hostis,
  • Ne caros animis subito disiungat amicos,
  • Quos Christi caritas caros coniunxit amicos.

  1. imple] comple MGH; simple Ms. ↩︎

  2. Laeta] Lecta MGH ↩︎

  3. devertit] divertit MGH ↩︎

  4. iam] tam MGH ↩︎

  5. lux] laus MGH ↩︎

  6. Pars animae] Vitae pars Ms. ↩︎

  7. prostrato] prostrata Ms. ↩︎

  8. sanus] terris MGH ↩︎

  9. Angelici faciem caram] Utque mei curam MGH ↩︎

  10. laeto] lecto MGH ↩︎

  11. nutum] natum MGH ↩︎

  12. spes, laus, et gloria] spes et laus, gloria MGH ↩︎

  13. amatis] obortis MGH ↩︎

  14. requiescit] requiescat MGH ↩︎