Latin Hagiography
A preliminary digital legendarium

Acta Gumesindi presbyteri et Servi Dei monachi, martyrum Cordubae in Hispania


Sanctus Gumesindus presbyter ex oppido Toletano olim cum utroque parente puer adhuc parvulus Cordubam veniens, votivo genitorum affectu, per sacrum clericatus ordinem caelesti adscriptus militiae, apud basilicam sanctorum trium, qua Faustus, Ianuarius et Martialis martyres praesentialibus corporum suorum favillis quiescunt, paedagogorum educatione in Dei timore clarescit. Ubi post aliquod tempus in sancto Diaconii ministerio consecratus; demum cuiusdam Campaniae Cordubensis ecclesiae sacerdos adolescens praeficitur. Inde ad urbem descendens, cum beato Servo Dei monacho, qui tunc in supradicto sanctuario adhuc iuvenis cum Paulo presbytero reclusus manebat, principibus et iudicibus ambo assistentes, sub confessione caeterorum occubuere, Idibus Ianuarii, aera octingentesima nonagesima. Quorum corpora furtim a Christianis sublata, in basilica Sancti Christophori Martyris, quae est ultra amnem, in parte meridiana, religioso cultu extant recondita.